廣州作為全中國服裝批發市場嘅其中一個重要據點,除咗嚟到飲飲食食,邊少得買衫呀。
今次旅癮帶大家來到廣州火車站掃貨啦!火車站商圈有好多批發城,手錶、玩具乜都有。今次小編精選咗3間必去嘅服裝批發城,冒住偷拍俾人鬧嘅危險,準備好銀紙出發啦!
- 匯美國際服裝城
匯美國際服裝城一共有六層,一樓最旺最多人。小編喺喱到見到勁多淘寶款式嘅衫,而且價錢都唔貴,39蚊就有交易,質地舒服。
(小編都忍唔住入貨啦)
行上幾層就會多翻啲少見嘅款式,甚至仲會有自創品牌,咁就唔怕去到邊都同人撞款啦!
好處在於,雖然有啲款淘寶都有,但起碼實實在在摸到質料,唔怕再買到貨不對版嘅衫啦!
營業時間:10:00 -18:00
地址:廣東省廣州市荔灣區環市西路139號
地鐵:廣州火車站F出口步行50米
- U:US
大家都聽過韓國嘅東大門批發市場,有冇諗過廣州都有個「東大門」呢?U:US由韓國東大門同埋中國團隊一齊運營,簡直就係「中韓混血兒呀」。
入面除左有韓國嘅獨立原創設計師品牌入駐,仲有接近100間中國原創設計品牌。
而且環境非常明亮乾淨闊落,啲售貨姐姐仲幾靚女。無論設計同質量都十分上乘。所以相對嚟講消費都會比另外兩間稍高。
但都有特價貨品100蚊3件,細心啲搵一定搵到你心水嘅!
營業時間:10:00 – 19:00
地址:廣州市越秀區廣園西路14號
地鐵:廣州火車站,F出口,步行700米即到。
- 紅棉國際服裝城
紅棉國際服裝城係廣州最出名嘅服裝批發市場之一,企係門口已經聽到各間店舖強勁嘅音樂。一共有9層,衣服標價有幾十至百元不等,零售批發都有。
部分舖頭不設零售,可以留意返門口貼住嘅紙張。除左要準備充足嘅銀紙,仲要有充沛嘅體力,因為大部分商家會將衣物直接用大袋裝住,非常考驗大家嘅體力同耐性去淘好貨。
來到紅棉大家一定會見到獨特嘅「穿版模特」,由於人流量大都不設試穿,想試嘅可以俾穿版模特試。佢地入面只會著住背心仔同走光褲,除左要年輕貌美皮膚白,仲需要一顆堅定嘅心,唔理其他人嘅眼光。
營業時間:8:00-18:00
地址:廣州市越秀區環市西路184號紅棉國際服裝城
地鐵:廣州火車站 D4出口