夏日想keep住最fit身材著短裙短褲靚靚出街，除了保持適量運動，最重要的當然就是吃得健康啦！ 今日，小編為大家挑選了五間近期澳門超紅的沙律輕吃店，無論是Salad、三文治還是酵素果汁，都各有特色， 快啲睇下有咩營養又低卡嘅健康餐推介啦！相信總有一款啱你口味~
心鮮出爐：關閘區即叫即做，飽肚唔肥創意沙律
如果你們在關閘附近想找一間即叫即做的營養餐，「心鮮出爐」就啱曬你，佢哋有多款SET好嘅沙拉盒子，啱曬唔吃得均衡又低熱量嘅朋友。當然都會有自選沙律區，客人可以自由搭配屬於自己的健康營養餐！
主打還有十幾款特色三文治和墨西哥卷，新奇好食，每款都是招牌，款式多到可以解決一個月嘅中午飯，住關閘區的朋友就一定唔可以錯過啦！
特色必點▼
♥ 火辣辣三文治
招牌的火辣辣三文治好特別架，裡面包有火雞麵、蔬菜、煎蛋、火腿等，唔會太辣，配合得剛好。整個三文治大到一啖咬唔曬，好足料連男仔都絕對可以食得飽，真心推薦哦！
♥ 海陸空盒
相信有好多人同小編一樣都係食肉獸，食沙律又唔想太齋。海陸空盒就可以一次過滿足你3種肉望，牛肉肉質鮮嫩，入面嘅蝦又新鮮又大粒，仲有口感嫰滑多汁嘅雞肉，最後爽口的沙律絕對能增加口感。想食咩都幫到你，睇到都流曬口水啦！
心鮮出爐
地址：菜園涌邊街嶺南大厦地下M鋪70號
營業時間：11:00-19:30
人均：澳門幣40元
The Tree Salad 綠野沙律：澳門少有的堂食沙律，好吃不貴低卡路里首選
The Tree Salad的皇牌夏威夷波奇飯Poké Bowl健康又低脂，喜歡新鮮配搭的你不容錯過，低卡之餘又健康美味，補充身體所需的纖維和營養。所有的食材自己想點配搭都得，還可以自由選擇醬汁，味道超豐富哦！
店內還有多款招牌沙律、波奇飯、三文治，滿足大家不同的口味需求。另外The Tree Salad唔同其他外賣店，還有得堂食哦，真係放工食飯Hea腳嘅好地方！
特色必點▼
♥ 牛牛溫泉蛋波奇飯
大家知唔知「波奇飯」係咩呢？Poké源於夏威夷語，意思係「切塊」將配料切成細細塊，調味後再加埋新鮮蔬菜和米飯，咁就搞掂一碗又低卡又有營養嘅「波奇飯」。牛牛溫泉蛋波奇飯完全保留牛肉原有風味，美味高蛋白，絕對係減肥減脂的首選！
牛牛溫泉蛋波奇飯
♥ 吞拿魚牛油果波奇飯
吞拿魚牛油果波奇飯
The Tree Salad 綠野沙律
地址：澳門肥利喇亞美打大馬路2-B號新昌大廈地下B舖
營業時間：11:00 – 20:00（逢星期日休息）
人均：澳門幣60元
HabitBox 輕食：打卡影靚相的創意輕食店
HabitBox輕食推出一系列唔同嘅營養食品，例如佢哋嘅招牌門市限定Naked Coconut Açai Bowl，Açai Bowl選用來自亞馬遜森林的 Açai powder (巴西莓粉)，加入冰凍嘅水果打碎作為果蓉底，加上豐富嘅新鮮水果、果仁及燕麥在面層、以椰子殼作為裝飾。名副其實係好味又新鮮、健康又營養、零添加同埋零罪惡感嘅低卡神器！
HabitBox 最近推出了超值優惠套餐，可以一次過訂購五到六日量嘅健康餐，仲可以將每一餐都設置到唔一樣，自己配搭想要嘅餐盒，超方便啊！
特色必點▼
♥ 烤時鴨胸菠菜南瓜燉飯
南瓜風味的燉飯綿密而濃郁，燉飯需要在鍋邊悉心照料，真係慢工出細活才能讓高湯充分煮進米粒內~佢哋將肥美的鴨胸下鍋煎到金黃焦香，一口咬下肉汁滿溢，可以說是風味別具！整個燉飯味道唔會好單一，完全唔似健康餐，但又可以補充人體所需的維生素。有肉有菜有飯，健康得黎又好食，又係一餐好滿足嘅飯！
烤時鴨胸菠菜南瓜燉飯
♥ 牛油果吞拿魚溫泉蛋紫菜拌飯
Habitbox最近研發的「牛油果吞拿魚溫泉蛋紫菜拌飯」好受歡迎架，牛油果和吞拿魚令到整個沙律的口感大大提升，一個飯就完全滿足所有需求。唔好以為依個飯好Heavy，其實佢先390卡路里，完全可以放心大啖食啊！
牛油果吞拿魚溫泉蛋紫菜拌飯
另外如果大家對生酮飲食感興趣，Habitbox都有專屬餐盒，好多健身專業教練都一直有幫襯佢哋架！只不過大家記得要均衡飲食，按住自己食量點，唔好因為太吸引而點太多，食唔完就浪費食物啦！
HabitBox 輕食
地址：氹仔海灣花園地下BC
黑沙環第四街44號
營業時間：11:00-20:00
人均：澳門幣70元
SAUCE Salaboratory 蔬士沙拉：DIY沙律套餐，12款醬料任你揀
蔬士沙拉擁有多款美味和營養均衡的健康餐。佢哋用少鹽、少油的烹調方式，沙律入面的卡路里、蛋白質、營養價值表一目了然。還可以有唔同嘅配搭，自己DIY揀食材做一份啱自己口味嘅沙律，令你食得美味同時又健康！
偷偷告訴你，佢哋嘅醬料有多達12款可以選擇，好想全部試曬啊。另外，佢哋嘅飲品都唔輸蝕，有現做冷壓式果汁和健康營養奶昔，咁就唔怕食到好Dry啦！
特色必點▼
♥無花果魷魚沙律
蔬士沙拉推出了有含豐富膳食纖維嘅無花果魷魚沙律。抗氧化能力強，仲有多種維生素，新奇又好味，越食越靚‼️ 仲有好多款式，總會搵到款啱心水嘅沙律。
♥ 牛油果雪花牛肉沙律
牛油果係不少人的瘦身恩物，如果進行健康飲食管理嘅你，牛油果就是個不錯的選擇。它的果油容易吸收，有滋潤肌膚、消除細紋的作用。一份沙律入面仲有雪花牛肉做主食，份量真係唔少架，小編覺得佢哋嘅每一份都搭配得好好，食完一份啱啱好飽，唔會話太多食唔曬，浪費食物啦！
牛油果雪花牛肉沙律
SAUCE Salaboratory 蔬士沙拉
地址：澳門關前後街俊秀里仁康樓地下B
氹仔廣東大馬路235號鴻業大廈地下J
營業時間：11:00-20:00
人均：澳門幣60元
Top Salad沙律掂：素食者必試Pizza套餐
熱愛沙律嘅素食者，如果唔知有咩選擇，咁點算好？！Top Salad沙律掂就幫到你啦～佢哋有十幾款搭配好嘅沙律套餐，有幾款係純素食，如果大家覺得唔夠飽都可以另外加小食架！
沙律食到悶唔緊要，佢哋仲推出了素食下午茶Pizza套餐，啱晒一個人自私食，絕對係素食人士的好去處。另外，佢哋嘅飲品健康又好飲之餘仲美顏養生，好適合一眾想要減肥修身的小仙女！
特色必點▼
♥豬頸肉沙律
夏日沒有食慾的時候，當然要食豬頸肉沙律啦！食之前加入醬汁拌匀， 豬頸肉配埋菜一齊食， 味道和口感豐富到令人欲罷不能啊。整個沙律夠味又唔怕乾身，清爽不油膩，食完之後完全沒有罪惡感~
Top Salad沙律掂
地址：澳門黑沙環涌河新街海濱花園地下B鋪
營業時間：10:30-20:00
人均：澳門幣50元
睇完這5間唔同嘅沙律輕食店，間間都真係真材實料，全部都好Fresh好抵食，健康得黎又唔怕餐餐都一樣，仲可以自己配搭想要嘅餐盒，滿足你味蕾之餘又健康，啱曬想試新野嘅你，仲唔快啲收藏好，咁就可以解決今日到底食咩依個世紀大難題啦！
