原來唔洗大佬價錢就食到大佬嘢

喺澳門食飯飲茶嚟嚟去去都係嗰幾間，最近小編就發掘一間CP值好高嘅酒樓【福臨門】，重推出咗好多新款精緻粵菜，每款都好有睇頭，重點係價錢唔貴！唔貴！唔洗大佬價錢就食到大佬嘢，連小編都覺得有下次！

黑松露野菌素包 ($46）

想食得健康啲嘅院友們可以試呢款點心啦～素包外形以蘑菇形狀為造型，簡直可以以假亂真！大廚採用中國雲南的黑松露，味道冇其他黑松露濃烈，淡淡松露清香岩曬口味偏清淡嘅健康人士。

燈影煎堆-＄38

每一道睇落好簡單嘅點心其實都要有返咁上下功力去製作㗎～好似呢個「燈影煎堆」唔好睇佢個樣咁似UFO，其實佢內有乾坤～佢嘅外皮吹彈可破，重可以隱約透光，口感香脆油而不膩，要做到呢個口感，油炸火喉同時間都要控制得非常精準，少啲功力都整唔到啊！

論精緻度呢兩款點心一定唔會輸蝕～

日式甜蝦芋角-$48
小編睇到呢款點心已經心花怒放啦！除咗佢嘅造型精緻外～ 口感非常豐富多層次，炸至酥脆嘅芋頭外皮配上整隻甜蝦嘅內餡，呢個配搭超有驚喜啊！

————————–————————
原隻鮑魚酥-$58

呢款鮑魚酥令小編最為驚豔嘅係佢嘅酥皮～酥皮烘焙要極為注重火喉控制，外皮先可以咁鬆脆而香濃。至於上面嘅鮑魚以古法扣製，一啖咬落去鮮香鮑魚味圍繞住成個口腔，配合外趣內軟嘅口感，廚師重好貼心整成一口大小，岩曬小編啲櫻桃小嘴嘅食家！

黃金魚子蘭度炒富貴蝦（$198/小 ，＄328/例）

呢個菜就巴閉啦，瀨尿蝦蒸就食得多，用魚子醬炒你又試過未？「富貴蝦」採用咗原隻瀨尿蝦，剝殻後加入嚴選珍貴魚子特製醬汁炒起，完美地帶出蝦嘅鮮香～

極品龍蝦餃($38)

傳統蝦餃係飲茶最受歡迎嘅點心之一，經大廚巧手妙思，由普通蝦仁升級至龍蝦，令蝦餃更添鮮味和嚼勁。

羊肚菌黑豚肉燒賣($58)

健康人士首選點心～呢款「羊肚菌黑豚肉燒賣」嘅特別之處係喺餃皮內加入菠菜汁，搭配新鮮嘅羊肚菌同小巧嘅黑豚肉，簡直係營養同美味兼備！

————————–————————
招牌當紅炸子雞（$248半隻，488全隻)

呢款係小編極推嘅新菜式，因為小編平時對雞皮冇太大好感，但試完呢個炸子雞之後，小編對雞皮完全改觀，皆因透過大廚控制火喉的精準度，令雞皮相當鬆脆而不乾，脂肪不膩而雞味香濃，更加鎖住咗雞肉嘅肉汁～

———————————————-
福臨門
地點：澳門銀河2樓2008鋪