除咗住同食之外，去廁所大概係人類生存最不可缺少嘅一項環節。 正所謂「廁所如伴侶」，喺澳門搵個去得舒服順暢又適合自己嘅廁所，分分鐘仲難過搵女朋友！小編為咗大家嘅幸福，早排專登去咗全澳各大酒店嘅廁所，發現每個廁所嘅特色都各有千秋，等小編帶大家睇吓佢地有幾「特別」啦！
最華麗廁所：巴黎人，永利皇宮大堂
巴黎人同永利皇宮係澳門比較新嘅賭場酒店，除咗環境新淨，裝修華麗奢侈令人眼前一亮之外，入面嘅廁所亦令小編極為驚豔！
位於巴黎人商場大堂嘅廁所， 女廁以白色及金色為主色，男廁則係暗紅色及黑色，配搭歐洲巴洛克時期嘅宮廷花紋，完全突顯到佢嘅高貴同霸氣。
廁所內觀都唔輸蝕，燈光非常明亮，無論係洗手盤或廁所嘅設計亦加入咗唔少宮廷式嘅設計元素，廁所牆壁印有華麗嘅紅色暗花，配搭黑白菱格紋地板， 夠曬賞心悅目，連痾個屎都香啲！
加上廁所門厚重而唔透風，隔音效果相當厲害，關門後就可以慢慢享受屬於自己的皇室貴族待遇啦！
相比起巴黎人高貴典雅嘅廁所設計，永利皇宮大堂嘅廁所以白色，粉紅色及金色為主色，增加了一份童話般嘅少女氣息。洗手間入口前放置咗好夢幻嘅梳妝枱擺設，小編好似穿越現實去咗故事書描寫嘅城堡咁，以為自己變身做咗童話故事嘅公主！
裡面嘅裝潢設計一絲不苟，金碧輝煌，就連化妝鏡旁嘅六角造型燈飾同天花嘅燈籠造型吊燈都非常精緻。
而每個廁格都掛住唔同嘅藝術畫作，小編可以一邊如廁一邊欣賞廁所嘅環境， 夠曬賞心悅目！至於廁所方面，廁板中間係斷開，唔係成塊過嗰種，坐落去就被迫要分開雙腿就番個罅隙，小編就略嫌呢個設計唔夠貼心，想長時間打躉嘅院友們就要注意吓啦！
私隱度最高廁所：文華東方酒店
講到痾屎痾得順暢，裝潢華麗只係冰山一角，最重要嘅元素莫過於要有良好嘅私隱度，文華東方嘅廁所絕對係首選。皆因佢嘅地理位置喺一個非常唔顯眼又優暗嘅轉角位，莫講話遊客，就算本地人都難以發現。
廁所唔算大，只有兩個廁格，唔使驚多人同時使用廁所，相當寧靜，而且清潔人員清理次數頻密，一啲都唔馬虎，衛生環境一流。燈光略嫌陰暗，屬於情調類型。廁所門採用頂天花板設計，隔音效果絕對係世界級，一山門就好似與世隔絕咁，如果想享受屬於自己嘅私人空間，文華東方酒店廁所一定係不二之選！
人流：1
最有特色廁所：新濠天地，新濠影匯
新濠集團貴為本地企業，一睇就知佢嘅裝潢風格同其他外資博企唔同。相比其他博企既華麗奢侈，新濠天地同新濠影匯就偏向行簡約嘅歐美時尚風，商場內嘅廁所亦不失平凡。以新濠天地商場二樓嘅廁所為例，廁所外畫上具有強烈性風格嘅街頭塗鴉，男女廁所外門亦分別畫上塗鴉風格嘅性別標誌，好似去咗美國街頭咁，夠曬特別啊！而女廁入面只有二個普通廁格及一個殘疾人士廁格，人流多起想嚟就要排吓隊啦! 小編隨機抽樣廁格， 發現有紙巾未沖去，廁紙卷亦無任何遮蓋，衛生狀況有改善空間。
至於入面嘅氛圍就比較陰暗，化妝鏡的顏色亦唔user-friendly，所以對於要補妝照鏡嘅院友嚟講就未必太適合啦！
另外，值得一讚係洗手盤的水龍頭有熱水冷水選擇，而且水感好快，唔怕得十世都無熱水出。
而新濠影匯商場嘅廁所亦夠曬貼題，為咗突顯鮮明嘅主題，外觀採用百老匯風嘅復古剪影元素，內觀整體設計偏向簡約貼地風，廁所空間寬敞，廁格亦非常充足，人流多都唔洗等！不過！每個廁所門的［海拔］十分低，廁所門嘅設計較矮，身高較高的人可能會望到廁格入面！安全性方面有待加強。
廁格衛生方面，有廁格蓋上廁板，亦有廁板上嘅廁紙未清理。
燈光尚算明亮光猛，洗手盤另一面亦設有專屬化妝空間，鏡嘅數量多到數唔曬，梗係入嚟補番個靚妝先啦！
人流：3
最嘆厠所：百老匯
百老滙喺澳門都算比較新，內裏裝潢及環境都不錯。去過百老滙嘅人應該都知道佢嘅特色就係在於音樂同美食嘅融合，一路享受美食之餘，又可以聽着音樂慢活人生。佢嘅廁所當然都不例外，雖則面積不算大，但勝在闊落，有足夠空間如廁，而且仲會播放現代音樂，岩曬年輕人享受，一路聽音樂，一路如廁，人生一大享受，加上人流量不高，可以獨自享受音樂同如廁帶來的放鬆。
人流：2
最得合國情厠所：威記大運河商場
威記大運河商場作為全澳門最大嘅購物商場，而旅客來源都係來自內地，日日都要接待無限多旅行團，個廁所就一定會係使用量最高，人流高峰期（下午三點至六點）更加要大排長龍。因為使用量過大，清潔程度追唔上使用率，導致氣味及環境衛生都較為惡劣，就算有香薰都掩蓋唔到本身嘅臭味。
隨機抽樣嘅廁所，有90%都係佈滿廁紙／冇沖廁／廁紙淤塞等等…雖然係同一個地方，但相比地下金光會展展覽中區嘅廁所，三樓大運河商場嘅真係差天共地。
